Neeli Patang...

chalte chalte achanak ek sarsarahat suni,
asman ki or sar utha kar dekha,
ghataen chaayin hui thi,
aur kai patangein udti nazar aayin,
Lal, hari, peeli, gulabi,
anek rangon se akash ko alankrit karti,
hawa ke veg se idhar udhar athkhelian karti,
kayi patangein nazar ayi.

par tabhi achanak ek neeli patang aayi,
uske aage kisi ki ek na chal payi,
aur kuch hi ksharon main asmaan main keval neeli patang hi nazar aayi,
aisa laga mani aksah ne kisi rangeen kapde ko badal kar,
ek sadharan sa vastra dharan kar lia ho,
jispe ek neela teeka hai,
Mujhe laga ki lagta hai ki koi bada patanbaaz hai,
fir laga ki kyon na jakar dekhoon ki kaun hai,
jakar dekha to ek nanha sa baccha,
us neeli patang ki dor apne hath main lie hue,
masti main jhoom raha tha,
main uske kareeb gaya,
uski peeth thapthapayi,
aur poocha ki aise baariik daanv kaise seekhe?

Baacha bola ki galtion ko samajhkar,
unhe dobara na karke,
naye daanv khud se seekhkar,
usne apna avijit samrajya failaya.

Tab mujhe samajh main aaya ki,
sabse aage badhne ke lie,
sabse tez daudna padta hai,
thokar se bachne ke lie,
door se thokar ko dekhna padta hai,
yadi thokar lag bhi jaye to,
turant sambhalna padta hai,
aur sambhalne par nayi urja se daudna padta hai.

Isi udedh bun main ek baar fir asmaan par nazar padi,
fir se asman man kai patangein nazar aayi,
par fir us neeli patang par nazar padi,
ek ek karke rangeen patangon ne phir jameen ki khakh chaani,
aur kuch hi der main punah,
keval neeli patang nazar aayi,
main muskaraya kyon ki mujhe bhi nayi raah nazar aayi,
nayi raah jo shayad mujhe le jayegi,
aise jahan main,
jahan neeli patang meri hogi.

Amen.............

The following are two more poems written by my brother. I shall transfer all his posts to his own blog once gets one for him. Until then I shall be publishing for him.

Naya Daur

Acchai karo…..per doosron se uski apekcha na rakho,
Mitrata karo…...to socho ki usse kya kaam nikal sakta hai,
Safalta mile…..to na socho ki koi tumhari safalta se khus hai,
Aagey badho…..per kisi se madad ki asha na rakho,
Kaam bigde…..to chaho ki kisi ka na bane,
Samne wale ko….. humesha apne se kam samjho,
Ye hai vachan neeti ke aaj,
Aur andhera ghanghor hai,
Nahi…nahi…
Ye naye soch hai…..
Ye naya daur hai…..
Ye vichar agar rakhte hai aap,
To samajhdaar jaane jaengey….
Insani gun na hote hua bhi….
acche insaan kehlayenge….
Sadvichar jo rakhte hai aaj,
Wo moorkh kehlate hai,
Apna bhala wo ker nahi paate hai,
jeevan dukh main bitate hai……
per mera dil ye kehta hai,
gar soch badal ye jaye to….
Rishtey na tooten,
Apne na roothen,
jo dukhi hai wo dukh se ubar payega,
Jo toot gaya hai wo phir se vishwaas se bhar jayega,
Bhatkon ko raah mil jayegi…..
Haan………………..
NAYA DAUR TO NAYA RAHEGA….
BAS YE SOCH BADAL JAYEGI….




Hai roop per ye naaj kaisa

hai roop per ye naaj kaisa,
kis baat ka guroor hai,
khud per khud ka ye suroor kaisa,
ye chand kyun magroor hai……..

hum dekhe na tujhko…na sarahen….
Karein tareef na is roop ki,
To astitva tera vyartha hai,
Ye sundarta kis kaam ki….
Tej tujhko ravi ne diya,
Teri… sheetalta rajni se hai,
bas daag tere khud ke hai,
phir kyon ghmand mein chur hai…..


Tu ghmand kerna chod de,
ye guroor apna tod de,
tu jaan le is satya ko,
tu nahi hai is jahan mein ek,
per ek lakhon main jaroor hai…..


tujhe roop per hai naaj kaisa,
kis baat ka guroor hai,
khud per khud ka ye suroor kaisa,
ye chand kyun magroor hai……..

Woh

Woh uske uljhi latein,
Jab aankhon par girin,
aur jab usne unhe utha kar,
apne kaan ke peeche dabaya,
Tab mere man main prashna aaya,
Kahin ye wohi to nahi.

Jab maine use pehli baar dekha,
aur woh thora sa muskarayi,
Tab bhi mere man main khayal aaya,
ki kahin ye wohi to nahi.

Jab maine uski aankhon main jhanka,
aur unme ek taare ko chamakta hua paaya,
Wohi khayal fir se mere man main aaya,
Ki kahin ye wohi to nahi.

Aj bhi jab main uski ankhon, muskarahat aur laton ke aare main sochta hoon,
Uski har ek ada se ghayal apne ap ko paata hoon,
Ye meethe dard hi mujhe yakeen dilata hai,
Shayad wo wohi thi,
Shayad wo wohi thi,
Shayad wo wohi thi.

Aage main jo kavita likh raha hoon use mere anuj, Ratnesh Mishra, ne likha hai.

Jeevan Chakra

Mrityu nahi ant vyatha ka….
Tum phir paida ho jaooge…
Jis karanwash tha mrityu chuna…
Tum phir se aage paoge….
Sangharsha karo is jeevan ka
Jeevan to karma pradhaan hai…
Sangharsha aur dhaerya ko jisne chuna…
Wo hi asli insaan hai…

Dukh kyon aur kis baat ka hai…
Har dukh kaa ant ho sakta hai…
Naummeed na ho gar nakaam ho to…
Har nakaami ke baad saphalta hai

Gar mrityu ko gale lagaoge…
To kuch bhi nahi tum paoge…
Pehle the shayad kuch bhi nahi…
Ab karmheen kehlaoge…

Gar vyatha ko tumne pachaad diya..
To duniya main jaane jaoge...
bahutoon ke prernashrot banoge...
bahutoon ko mrityu se bachaoge…

ab to tum…pran… karo khud se….
ki jeevan path per chalna hai...
baadha ab aaye kaisi bhi...
himmat se usse ladna hai…

har raat ke baad savera hai...
andhere ke baad ujala hai….
Karm kerte aage bhado sada...
Naa socho kya phal milne wala hai…
Karm to phal ki janani hai…
Phal to baad main aata hai..
Jisne jaisa hai karm kiya...
Waisa phal hi wo pata hai..

Phal accha bura kisa bhi ho…
Per ye jeevan ka ant nahi...
Grahan to ravi ko bhi lagta hai...
Per wo…. khud ko kerta khatm nahi...
Raushan jag kerta hai phir se wo...
Aue hai khota kuch bhi nahi…

So dukhi, vyathit, chintit ho gar...
To aage badhne ki socho...
Aur… sochoge tum aisa to…
jeevan ko safal banaoge...

mriytyu nahi hai ant vyatha ka...
tum phir paida ho jaoge...
jis karanvash tha mrityu chuna...
tum phir se aage paoge…

-Ratnesh Mishra

Suprabhat

Surya ki kirnon ne,
kia prithvi ka abhishek,
Panchiyon ki chahchahat ne,
Kia raat ke ant ka udghosh,
Sheetal pawan ne,
Vrikshon main naya jeevan bhara,
Aviral behti nadi main,
Surya ne bhari ek abha,

andahkar ka ek sukhad ant hua,
nayi sambhavnaon ka janma hua,
kal chakra ka ek aur cahkra poora hua,
Fir se suparbhat hua.

Jharokhe se aati ek kiran ne,
Mujhe jagaya,
Mujhe ek nayi subah ka ehsaas dilaya,
Main apne pairo par khada hua,
Aur muskaraya,
Ek urja se apne antarman ko otprot paaya,
Fir se laga ki sapnon ko sakar karne ka samay aaya,
Ek baar fir se prayas karne ka samay aaya,

Kintu ant main fir se andhakaar ne apna samrajya failaya,
Aur safaltaon aur asafaltaon ke saath,
Muskarate hue maine apni ankhen band ki,
Jisse main ek baar fir se dekh sakoon,
Andhakaar ke ant ko,
Nayi sambhavnaon ke janma ko,
EK NAYE SUPRABHAT KO.

Pyaasa

Bahut pyaasa hoon main main,
Is pyaas ko bujhane ki Khwahish rakhta hoon main.

Ishwar ne rakhen hain imtihaan kai,
har mushkilon ko paar karne ki aas lie firta hoon main.

Ek hi jhalak mili uski aj tak,
Use baar baar dekhne ko aatur ho uthta hoon main.

Dheron prashna hai man main,
Unke uttar paane ke lie kuch bhi kar gujarne ki himmat rakhta hoon main.

Jo chale gaye door kahin,
Unse fir se milne ki aas lie firta hoon main.

Manzilen kai hain,
Un sab par apni chaap chorne ke sapne bunta rehta hoon main.

In sab aashaon ko apne saat samete hue,
Main har pal aage badhta hue,
Meethi yaadon ke saath lie hue,
Sapno ko baar baar jagate hue,
Is zindagi ko sahi mayene main jeene ki koshish karta hoon main.

Bahut pyaasa hoon main main,
Is pyaas ko bujhane ki Khwahish rakhta hoon main.

Asha

Sochta hoon main kabhi baith kar,
Ki main itna bekarar kyon hoon,
Manzil ko pane ke lie,
Uske paas jaane ke lie,
Use apna banana ke lie,
Apna sarvasva us par nyochawar karne ke lie,

Tabhi achanak kisi kaate ke chubhne se,
Vartaman ak achanak ehsaas hone se,

Mujhe laga ki,
Kya manzil wohi hai jise main paana chahta hoon,
Ki kya main us par apna sab kuch nyochawar kar sakta hoon,
Kya use hi apna banana se main apne jeevan ke lakshya ko pa sakta hoon,

Choti Choti Mushkilen hi prashna khade kari hai,
Aur mujhe baar baar aage badhne se rokti hai,
Man kabhi nirash bhi hota hai,
Par nirasha main bhi aasha dhoodhna hi asha hai,
Andhkaar main ujala dhoodhna hi asha hai,

Yeh asha mere andar nayi urja bharti hai,
Fir se mujhe sapne dekhne ke lie prerit karti hai,

Aur fir se main sochta hoon kabhi baith kar,
Ki main itna bekarar kyon hoon,
Manzil ko pane ke lie,
Uske paas jaane ke lie,
Use apna banana ke lie,
Apna sarvasva us par nyochawar karne ke lie,