Sunday, July 15, 2007

Parivartan

Jisse main dara karta tha,
Aj uska samna karna chahta hoon,
Use batla dena chahta hoon,
ki mujhe dara sake,
ab usme woh dum nahi hai,
har dar ko bhulakar,
Aj main bekhauf jeena chahta hoon.

Pyaar ka matlab badal chuka hai,
mujhe main swartha ghar kar chuka hai,
bhautikta ki talash main,
shayad main pyar ke sahi artha ko bhool chuka hoon,
bhool chuka hoon ki pyaar ke lie sachetan hona jarori hai,
Pyar ko sarthak banakar,
Aj main pyaar bhari zindagi ki shuruat karna chahta hoon.

Karma ki mahanta ko bhula kar,
aj main swapnon ko sacha maan chuka hoon,
karma kie bina hi fal ki lalsa rakhna main seekh chuka hoon,
alasya ne mujhe khokhla bana dia hai,
par is alasya ko tyagkar,
Aj main fir se karma pradhan jeevan shuru karna chahta hoon.

Main apne aapko, apne vicharon ko badal dena chahta hoon,
apne jeevan main prakash ki anubhuti karna chahta hoon,
Ae Zindagi,
Aj main fir se tujhe haasil karna chahta hoon......

Wednesday, July 11, 2007

Parichay

Socha kyon na khud ko apna parichay doon,
Main kaun hoon, kya hoon, ye khud ko batlaon.

Apne andar jhanka, khud ko tatola,
kabhi laga ki bahut mahatvakankshi hoon,
kabhi laga ki bhavuk bhi hoon,
kabhi laga ki sahasi hoon,
fir laga ki kaayar bhi hoon,
kabhi laga ki darshanik hoon,
fir laga ki abhi nasamajh hoon,
kabhi laga ki saccha hoon,
fir laga ki jhootha bhi hoon,
kabhi laga ki ek khiladi hoon,
fir laga ki abhi anadi hoon,
kabhi laga ki duniya jeet sakta hon,
fir laga ki ye asaan nahi,
kabhi laga ki sanvedansheel hoon,
fir laga ki kathor bhi hoon.

Haan yahi hoon main,
har subah ek nayi asha ke sath,
samay ki tarah aage badhta hua,
ek sadharan manuj,
jisne sapne bahut dekhe hai,
aur shayad unke lie ladna bhi seekha hai,
jisne khelna seekha hai,
jeetna bhi seekha hai,
aur haar ko samman ke sath sweekar karna bhi seekha hai,
jiske man main sabke lie karuna hai pyaar hai,
jo shayad kuch der ke lie krodhit ho,
jo shayad kuch der ke lie kisi se ghrina kare,
par ant main ek nayi shuruat ke lie,
ek nayi shuruat ke lie,
muskarata hua, hamesha taiyaar hoon main,
haan yahi hoon main..

Yahi hai mera parichay.........

Thursday, July 5, 2007

Os ki boond..

Ek boond Os ki,
patte par padi,
sarakte sarakte kinare par aa gayi,
latke latke, apne wajan ke bhar sehti,
subah ka intezaar kar rahi thi,
fir prabha muskarayi,
surye ki pehli kiranon ne,
us boond ko prakashit kia,
use naya jeevan dia,
os ki us boond ne,
aur kai saathi boondon ke saath,
banayi ek bahumulya jayamala ,
kia us patte ko vibhushit,
jiske saundarya ka varnan,
shayad shabd na kar sakein.

Par ye kya,
kuch hi der main us jayamala ka ek ek moti,
toot toot kar dhara main sama gaya,

Shayad oos ki ek boond bhi,
jeevan ke us satya ko batlati hai,
ki shareer to nashwar hai,
use ek din mitti main hi milna hai,
ab faisla hamare haaton main hai,
ya to jayamala ka shringaar karein,
is jagat ki sundarta badhayein,
ya seedhe hi dhara main sama jayein.

Friday, June 29, 2007

Neeli Patang...

chalte chalte achanak ek sarsarahat suni,
asman ki or sar utha kar dekha,
ghataen chaayin hui thi,
aur kai patangein udti nazar aayin,
Lal, hari, peeli, gulabi,
anek rangon se akash ko alankrit karti,
hawa ke veg se idhar udhar athkhelian karti,
kayi patangein nazar ayi.

par tabhi achanak ek neeli patang aayi,
uske aage kisi ki ek na chal payi,
aur kuch hi ksharon main asmaan main keval neeli patang hi nazar aayi,
aisa laga mani aksah ne kisi rangeen kapde ko badal kar,
ek sadharan sa vastra dharan kar lia ho,
jispe ek neela teeka hai,
Mujhe laga ki lagta hai ki koi bada patanbaaz hai,
fir laga ki kyon na jakar dekhoon ki kaun hai,
jakar dekha to ek nanha sa baccha,
us neeli patang ki dor apne hath main lie hue,
masti main jhoom raha tha,
main uske kareeb gaya,
uski peeth thapthapayi,
aur poocha ki aise baariik daanv kaise seekhe?

Baacha bola ki galtion ko samajhkar,
unhe dobara na karke,
naye daanv khud se seekhkar,
usne apna avijit samrajya failaya.

Tab mujhe samajh main aaya ki,
sabse aage badhne ke lie,
sabse tez daudna padta hai,
thokar se bachne ke lie,
door se thokar ko dekhna padta hai,
yadi thokar lag bhi jaye to,
turant sambhalna padta hai,
aur sambhalne par nayi urja se daudna padta hai.

Isi udedh bun main ek baar fir asmaan par nazar padi,
fir se asman man kai patangein nazar aayi,
par fir us neeli patang par nazar padi,
ek ek karke rangeen patangon ne phir jameen ki khakh chaani,
aur kuch hi der main punah,
keval neeli patang nazar aayi,
main muskaraya kyon ki mujhe bhi nayi raah nazar aayi,
nayi raah jo shayad mujhe le jayegi,
aise jahan main,
jahan neeli patang meri hogi.

Amen.............

Thursday, June 21, 2007

The following are two more poems written by my brother. I shall transfer all his posts to his own blog once gets one for him. Until then I shall be publishing for him.

Naya Daur

Acchai karo…..per doosron se uski apekcha na rakho,
Mitrata karo…...to socho ki usse kya kaam nikal sakta hai,
Safalta mile…..to na socho ki koi tumhari safalta se khus hai,
Aagey badho…..per kisi se madad ki asha na rakho,
Kaam bigde…..to chaho ki kisi ka na bane,
Samne wale ko….. humesha apne se kam samjho,
Ye hai vachan neeti ke aaj,
Aur andhera ghanghor hai,
Nahi…nahi…
Ye naye soch hai…..
Ye naya daur hai…..
Ye vichar agar rakhte hai aap,
To samajhdaar jaane jaengey….
Insani gun na hote hua bhi….
acche insaan kehlayenge….
Sadvichar jo rakhte hai aaj,
Wo moorkh kehlate hai,
Apna bhala wo ker nahi paate hai,
jeevan dukh main bitate hai……
per mera dil ye kehta hai,
gar soch badal ye jaye to….
Rishtey na tooten,
Apne na roothen,
jo dukhi hai wo dukh se ubar payega,
Jo toot gaya hai wo phir se vishwaas se bhar jayega,
Bhatkon ko raah mil jayegi…..
Haan………………..
NAYA DAUR TO NAYA RAHEGA….
BAS YE SOCH BADAL JAYEGI….




Hai roop per ye naaj kaisa

hai roop per ye naaj kaisa,
kis baat ka guroor hai,
khud per khud ka ye suroor kaisa,
ye chand kyun magroor hai……..

hum dekhe na tujhko…na sarahen….
Karein tareef na is roop ki,
To astitva tera vyartha hai,
Ye sundarta kis kaam ki….
Tej tujhko ravi ne diya,
Teri… sheetalta rajni se hai,
bas daag tere khud ke hai,
phir kyon ghmand mein chur hai…..


Tu ghmand kerna chod de,
ye guroor apna tod de,
tu jaan le is satya ko,
tu nahi hai is jahan mein ek,
per ek lakhon main jaroor hai…..


tujhe roop per hai naaj kaisa,
kis baat ka guroor hai,
khud per khud ka ye suroor kaisa,
ye chand kyun magroor hai……..
Woh

Woh uske uljhi latein,
Jab aankhon par girin,
aur jab usne unhe utha kar,
apne kaan ke peeche dabaya,
Tab mere man main prashna aaya,
Kahin ye wohi to nahi.

Jab maine use pehli baar dekha,
aur woh thora sa muskarayi,
Tab bhi mere man main khayal aaya,
ki kahin ye wohi to nahi.

Jab maine uski aankhon main jhanka,
aur unme ek taare ko chamakta hua paaya,
Wohi khayal fir se mere man main aaya,
Ki kahin ye wohi to nahi.

Aj bhi jab main uski ankhon, muskarahat aur laton ke aare main sochta hoon,
Uski har ek ada se ghayal apne ap ko paata hoon,
Ye meethe dard hi mujhe yakeen dilata hai,
Shayad wo wohi thi,
Shayad wo wohi thi,
Shayad wo wohi thi.

Tuesday, June 19, 2007

Aage main jo kavita likh raha hoon use mere anuj, Ratnesh Mishra, ne likha hai.

Jeevan Chakra

Mrityu nahi ant vyatha ka….
Tum phir paida ho jaooge…
Jis karanwash tha mrityu chuna…
Tum phir se aage paoge….
Sangharsha karo is jeevan ka
Jeevan to karma pradhaan hai…
Sangharsha aur dhaerya ko jisne chuna…
Wo hi asli insaan hai…

Dukh kyon aur kis baat ka hai…
Har dukh kaa ant ho sakta hai…
Naummeed na ho gar nakaam ho to…
Har nakaami ke baad saphalta hai

Gar mrityu ko gale lagaoge…
To kuch bhi nahi tum paoge…
Pehle the shayad kuch bhi nahi…
Ab karmheen kehlaoge…

Gar vyatha ko tumne pachaad diya..
To duniya main jaane jaoge...
bahutoon ke prernashrot banoge...
bahutoon ko mrityu se bachaoge…

ab to tum…pran… karo khud se….
ki jeevan path per chalna hai...
baadha ab aaye kaisi bhi...
himmat se usse ladna hai…

har raat ke baad savera hai...
andhere ke baad ujala hai….
Karm kerte aage bhado sada...
Naa socho kya phal milne wala hai…
Karm to phal ki janani hai…
Phal to baad main aata hai..
Jisne jaisa hai karm kiya...
Waisa phal hi wo pata hai..

Phal accha bura kisa bhi ho…
Per ye jeevan ka ant nahi...
Grahan to ravi ko bhi lagta hai...
Per wo…. khud ko kerta khatm nahi...
Raushan jag kerta hai phir se wo...
Aue hai khota kuch bhi nahi…

So dukhi, vyathit, chintit ho gar...
To aage badhne ki socho...
Aur… sochoge tum aisa to…
jeevan ko safal banaoge...

mriytyu nahi hai ant vyatha ka...
tum phir paida ho jaoge...
jis karanvash tha mrityu chuna...
tum phir se aage paoge…


-Ratnesh Mishra